ती पाइलाहरुको पर्खाइमा

यो लमतन्न परेर पसारिएको 

कसैले बनाइदिएको मुलसडकमा

आफ्ना पाइला चालेर 

आफ्नो गन्तव्यमा पुग्नेछु भन्ने अन्धविश्वासग्रस्त म 

रुमल्लिमात्र रहन्छु यायावर बनि

यिनै सडकबाट बाँडिएका दोबाटो र चौबाटोमा,

सडकलाई एक्लो पार्दै 

छरिएका बाटाहरुबाट च्यातिएका गोरेटाहरु सुनसान छन्

व्यग्र छन्

ती पाइलाहरुको पर्खाइमा 

चौताराहरु आह्वानको साउती गर्छन्

म जस्ता बाटो बिराएका वा नसमाएकाहरुको,

आफू हिड्ने बाटो बनाउन र गोरेटो कोर्न प्रयत्नरत 

अनि सङघर्षरतहरुको

पथप्रदर्शक हुन  |